sexta-feira, 12 de outubro de 2012

GOZI AMOR KU PAZ… NADA…SÓ GUERA





Galu dja kanta, dja kanta, dja kanta
Sol poku brilhante sta ta prupara
Pa nasse i ben mas un bes kenta tera
I mi li triste, sen sonu, ta lamenta…

Nha bida i ês grandi tristeza
Ês noti passadu tudu kordadu
Ta txora ês tempu disgrassadu
Ki tudu ê maldadi, tudu ê pobreza…

Homis sen pon, Mudjeres sen agu
Ti Kré txeu dja ka kré mutu txeu
Mundu sta parsi sima pekenu Dxeu
Tudu igual tudu miséria, sen algu…

Tudu ê guera, tudu ê desavensa
Tudu ki era bon… Na verdadi era
Gozi Amor ku Paz… Nada…Só guera
Só morti, só fomi… enfin só violensa!

João Furtado
Praia, 12 de Outubro de 2012
http://joaopcfurtado.blogspot.com